قصيدة للشاعر متعب الشاوش في و صف الابل

من طرف (007) الثلاثاء أكتوبر 28, 2008 1:51 pm

1. أنا هـوى بالـي بكـار(ن) مشاعـيـف

سـود(ن) تثيـر مـن الخوافـي خوافـي

2. سود(ن) غرابيب(ن) تلاد(ن) مواليف

يحـتـار مــن يخـتـار بـيـن السهـافـي

3. على الجمل وحـده جميـع التواصيـف

مـابـيـن هـذيــه وذيـــك اخـتـلافــي

4. سـنـاد وذهــان الوجـيـه ومشـاويـف

الـزيـن منـهـا اقـبــال والا مـقـافـي

5. الطول راهـي والغـوارب قفـا سيـف

جـرد الرقـاب وفـاهـق الـنـي عـافـي

6. فطس الخشوم تقول مابـه غضاريـف

ولحي(ن) ذراع ومسبل الوجه ضافي

7. روس الرمـاح اذانـهـا فــوق وقّـيـف

ومـن الجمـل راس وجنـوب وخفافـي

8. فج النحور أوسع مـن البـاب للضيـف

وهلّ(ن) ورى هزع العراقيـب وافـي

9. حرشا وبر داج(ن) سـواد الاطاريـف

عـزل العقيـد اللـي مـن البعـد لافــي

10.لا هبـرة(ن) مليـا ولا جنبهـا سخيـف

صوغة جمـال ورق زيـن(ن) يشافـي

11.مامثلـهـا سيـقـت ولا مثلـهـا شـيــف

الا مــع الفـصـام والا ابــن شـافــي

12.سـود الجبـال الشامـخـات المقانـيـف

للـي جلاهـا الوبـل والسبـل صـافـي

13.ابـل العـرب و أم الكـرم و المعاريـف

لاكـثـرت الـعـوان والـوقـت جـافــي

14.لاطاولت شهب الليالـي علـى الحيـف

مـزبـان اهلـهـا فالسنـيـن العـجـافـي

15.للضيف والجيـران واصحابهـا ريـف

لا خيّلـت منهـا المـطـر جــاك دافــي

16.مـراجـل الـلـي يحتـمـون المواقـيـف

اهل البخت واهل السيـوف الرهافـي

17.يرخـص لهـا كـل التعـب والتكالـيـف

اللـي ثمنـهـا راس قــرم(ن) سنـافـي

18.انشـد سهـل يعطيـك عنهـا تواصيـف

اليا قصـر عـن جـرد الارقـاب قافـي

19.الكسـر لـه حكمـه وشاعـر وحـرّيـف

فـرايـده سـبـك الـذهـب بالمـصـافـي

20.والناس فيها اصحاب نظره وعرّيـف

ولا اقول انا عرفي عن النـاس كافـي